Esta páxina pretende acercar virtualmente estes lugares a toda aquela xente que marchou da súa terra e que nunca voltou ou que o fai con menos frecuencia da que desexa e tamén ás xeracións posteriores que non coñecen a terra dos seus maiores.
Picture
  As Fermosas é unha aldea do concello de Carballeda de Avia pertencente á comarca do Ribeiro. Está situada nas estribacións montañosas limítrofes cos concellos de Avión, Melón e o concello de Covelo, xa na provincia de Pontevedra. Atópase no límite sur do recentemente declarado (20 de decembro do 2007- DOG do 18 de xaneiro de 2008) Monumento Natural da serra de Pena Corneira. Pouco despois de terse declarado este monumento natural creáronse unhas rutas de camiños naturais e isto permitiu a restauración dos muiños polos que transcurren as rutas e a creación de espazos e areas de recreo. As Fermosas constitúe un enclave crucial no deseño destas rutas pois dúas delas transcorren polo seu seo.

Ver As Fermosas nun mapa máis grande
A súa altitude oscila entre os 600 e os 650 m e o seu clima é o característico dunha zona de montaña con abundantes chuvias e ventos fortes no inverno. As noites son máis frias no verán con respecto á zona do Ribeiro, de menos altitude. Pola contra, nos días de inverno nos que a situación meteorolóxica é anticiclónica, disfrútase do sol desde a 1ª hora da mañá, mentres que no Ribeiro a néboa é persistente e, con frecuencia, incluso permanece as 24 horas. Debido a súa situación privilexiada pódese gozar dunha vista panorámica sen comparación. Practicamente se pode observar todo o val do Ribeiro coa excepción da súa capital, Ribadavia, que queda oculta polo monte de San Estevo de Novóa. Comezando pola esquerda e mirando cara o leste podemos contemplar O Carballiño, Cenlle, San Andrés, Esposende, Valdepereira, San Cristovo, Castrelo, San Paio e, xa na dereita, unha pequena parte de Arnoia.Na seguinte ligazón pódese contemplar mediante unha aplicación java unha imaxe panorámica que se desliza automáticamente e mostra todo o descrito anteriormente. Preme aquí para ver a vista panorámica.

   O tempo